Monday, May 23, 2011

عن المجلس العسكرى



طول عمرى من الناس فى البلد دى اللى عمر ما كان ليهم اى نوع من انواع الدعوة بالجيش. ماعرفش اى حاجة عنه غير المعلومات العامة يعنى, حتى ماعرفش كل الاسلحة و اسماءها.

اما حصلت ثورة تونس, اتوسمت خير فى الدنيا بشكل عام. و اما كنا بنتسحل يوم 28 كنت باقول – زى كل الناس – هو فين الجيش؟


و انا فى شارع القصر العينى يوم 28 بليل, و الضرب بقى من فوق و من قدام و ورا, و عربيات تجرى ع الناس, و قناصة تموت فى ناس وسطنا, و دخان, و مصابين ... شوفنا شوية دبابات بالوان كده فى الاول و فرحنا, قلنا الجيش جه و معانا.
طلع الحرس الجمهورى داخل الميدان من كل الشوارع عشان يحمى المبانى الاستراتيجية اللى فيه. وقتها كل اللى فهمناه ان دبابات الجيش دخلت الميدان و الداخلية ليسة بتضرب فينا.
فى مننا وقتها قالوا "هو الجيش مع الداخلية ولا ايه يا جدعان؟" ... بصراحة شديدة جدا, انا كنت واحدة من الناس اللى رفضوا يصدقوا ده.
و مفيش بعدها بمدة قليلة اوى, كانت دبابات الجيش داخلة الشارع, و الناس بتتشعلق عليها, و بيحيونا بعلامة النصر, و بيضحكوا فى وشنا
بس مش هانسى برضه وشوش اللى جم فى الاول, كانوا مش مستوعبين ان الموضوع للدرجة دى, ناس بالكوم بيتحاموا فيهم بعد ربنا, واقفين لأسفل و اقذر انواع العنف. رجالة و ستات بيقعوا ع الارض و يقوموا.
انا فاكرة فى نص الانفعال, جريت فى نص الشارع على دبابة و بصيت فى عين العساكر اللى فيها و بقيت بشاور على اتجاه الداخلية و بنط لفوق و بأعلى حسى بازعق و اقول لهم "بيضربونا ... بيضربونا" و مش هنسى نظرتهم ليا, كانوا فعلا فيما يقرب للصدمة.
و بعدها كنا طبعا فى حرب الشوارع بتاعت الساعات الاولى من 29 و احنا بنجرى من امناء الشرطة اللى بسلاح و البلطجية و الحرامية اللى بيسرقوا, و وصلنا فى جاردن سيتى لكم دبابة كده. كنا اربعة, سلمنا على افراد الجيش اللى موجودين – انا مش باعرف الرتبة من اللبس و كده فماعرفش هم كانوا ايه – المهم بصيت لواحد باين عليه انه كبيرهم و قلت له "انتوا كنتوا فين؟" رد عليا و قال لى "انتوا مش طلبتونا؟ ادينا جينا" رديت عليه "ربنا يخليكوا لينا"

و بعدين ايام الاعتصام, و حكايات ايام الاعتصام
و شفيق, و الضرب اللى هم ضربوه فينا عشان شفيق
و ايام تشيلنا و ايام تجيبنا
و ناس تنضرب فجأة بالمولوتوف فى عزب و عشش و شهاداتهم تقول ان الجيش هو اللى ضرب, و اعتصام يتفض بالضرب و البلطجية فى حماية الجيش, و انتهاك لحرم الجامعة و ضرب للطلبة المعتصمين و الاساتذة, و اعتقالات!!!! ايوة اعتقالات ... و محاكمات عسكرية, و الطلبة المعتصمين يتفصلوا من الجامعة .... و غير كده من اللى كلنا عارفينه


انا قصدت اكتب الكلام اللى فى الاول مش عشان ارضى حد او اسبق بكلام كويس عشان اقول اللى انا عايزاه. انا قصدته عشان دى حقايق, حقايق انا شفتها و عيشتها مش حد اللى حكى لى عنها. و عشان دى حقايق انا فاكراها و مش هانساها ان شاء الله


انا مش نازلة يوم الجمعة عشان اقف ضد الجيش, و لا عشان اشتم فى افراد. انا نازلة لانى شايفة ان الحال مش نافع

-اباطرة الفساد استغلالا للقانون و ثغراته و متاهات الادلة و التحقيقات بيطلعوا واحد ورا التانى, فى الوقت اللى فيه شبابنا بيتقبض عليهم لأى سبب و فى تلات ايام اهاليهم يلفوا وراهم فى النيابات العسكرية يلاقوهم اخدوا احكام عسكرية لا جدال فيها ... ينفع؟

-الصوت السلفى ايا كان هو مين و من فين, خرجت الامور عن السيطرة  عليه لدرجة ان يتم التعدى على حرمة الكنيسة و ده بيسخن النيلة الفتنة اكتر و اكتر, و برضه مش هننسى ان كنيسة اطفيح اتهديت ببلدوزر قعد يهد فيها حيطة ورا التانية قدام الكل ناس و جيش و عادى .... ينفع؟

-دلوقتى مفيش اى نوع من انواع الاساس و الضوابط اللى يتبنى عليها الدستور. يعنى مش ممكن نسيبها للبرلمان القادم سايبة لحد ما نلاقيه عامل لنا دستور يلعب فى مواثيق حقوق الانسان و قوانين المواطنة ... ينفع؟

-طارق كامل وزير الاتصالات السابق جاله قرار بالعلاج بالخارج على نفقة الدولة اللى كل شوية يقولوا ماعهاش فلوس خلاص – الخبر غير مؤكد - ... ينفع؟

-جمال مبارك بتتحفظ التحقيقات معاه واحد ورا التانى ... ينفع؟

-سوزان قال ايه عايزة تمشى فى حوار قال ايه رد الفلوس ده ... ينفع؟

- اهم من كل ده بقى:
التحقيقات مع افراد الداخلية المتهمين بقتل الناس يوم 28فيها مماطلة غريبة و مستفزة, يا عالم دى ثورة, يعنى كان ممكن اوى العالم دى بالذات بالاسم كده تتعدم فى الميادين العامة. وائل الكومى ده مثلا مش هنرضى باقل من انه يتعدم فعلا
و كمان اهالى الشهداء بيتضغط عليهم و بيتهددوا و بيقولوا لهم خدوا فلوس و اخرسوا ... بذمتكم انتم ينفع؟
ربنا ما يورينا تانى اللى حصل يوم 28, بس والله اللى شاف مش قادر ينسى, و لا قادر يستوعب يعنى ايه الناس دى ماتتحاسبش ... والله ما ينفع!


يا سعادة الجيش : انت كتر الف خيرك اوى لحد كده, و متشكرين. بس فعلا الموضوع دلوقتى خارج سيطرتكم تماما, فعلا مش عارفين تلموها, و هو مش دوركم اصلا انكم تلموها. خلاص بقى, متشكرين لحد كده و يا ريت نحاول محاولة تانية بما تقتضيه تداعيات المرحلة الحالية ... مجلس رئاسى مدنى مؤقت

المجلس ده هايبقى مطالب قدامنا ب
1الغاء حالة الطوارىء
2قانون ممارسة الحقوق السياسية
3الافراج التام عن كل المعتقلين
4المحليات و المحافظات



يا ريت بقى نخلص من الحدوتة دى بسرعة لان فعلا كده مش نافع, و فعلا فى قطاعات فى البلد حالها مش ماشى, و امان الناس مش قد كده حتى لو بيتدلعوا, اهم بنى آدمين و لهم حقوق.
البلد واضح جدا يعنى انها فعلا دلوقتى مش ماشية زى ما اى حد عايز خالص
نعمل ايه؟ نجرب حاجة تانية. حتى لو المجلس الرئاسى مش مثالى, اهى محاولة جادة لتحقيق مطالبنا الشرعية اللى مفيش بديل عن تحقيقها مش عشان اى حاجة غير انها اساسيات لبداية حياة عدلة.

يعنى احنا حاليا فى موقف المتدبس ... حتى اللى فى الناس كان مش عايز ثورة و ماكانش معانا, اعتقد انه عارف ان مفيش بديل خلاص عن اننا نكمل... مفيش بديل

يمكن انا عايزة اكمل من غير ضغوط, بس اهه بحاول اشوف كل الاراء



عشان كده من الآخر باقول شكرا للمجلس العسكرى و يا ريت – لو انت فعلا يعنى كده – تحمى القورة و تعمل على تنفيذ مطلبنا

و الا انتوا عارفين ... احنا خلاص وحشنا الغاز و الحمد لله ربنا مقوينا و معانا


شكرا و سلامات


Sunday, May 22, 2011

ميعادنا الجمعة الجاية ان شاء الله





انتوا عارفين طبعا هانعمل ايه. مش محتاجة كلام

ربنا معانا يا رب ان شاء الله



تحديث فى قضية السعودية: القبض على منال الشريف


القبض على منال الشريف بعد يوم من محاولتها التانية لانها تسوق العربية و تصور نفسها بالفيديو
عايزين نحاول نساند الست دى يا جماعة. عملت ايه هى عشان يتقبض عليها
الهاشتاج بتاعها اهه


 ربنا معاكى يا رب ... و ربنا ع المفترى ان شاء الله. هى حاليا بخير بس بقالها عشر ساعات فى الحجز و نقلوها للدمام, و بيقولوا انها بس هاتمضى شوية ورق و تطلع. ادعوا لها
انا فخورة بيكى اوى يا منال

تحية ... لستات السعودية


يا الف نهار ابيض ... يا ميت الف نهار مبروك

الستات فى السعودية قاموا يا جماعة. انا عايزة ازغرد والله!

ان شاء الله, فى يوم الجمعة 17 يونيو اللى جاى, اى ست – سعودية او غير سعودية – و معاها رخصة قيادة دولية, هايسوقوا مع بعض فى شوارع السعودية.

على فكرة كان فى محاولة من بتاع 20 سنة كده بالضبط فى 1990 فى وسط حرب الخليج التانية, اما شافوا الامريكيات بيسوقوا الدبابات, و الكويتيات بيسوقوا عربياتهم بعيالهم, حسوا انهم لازم يعملوا حاجة فى الموضوع ده. و لموا بعض 47 واحدة و مشيوا بالعربيات لمدة ساعة, لحد ما اتقبض عليهم يوم و اتمنعوا من السفر سنة و بعضهم اتحرم من الشغل ستنين و نص.

المرة دى الظروف مختلفة ... ليه؟

اولا فى تقبل احسن داخل السعودية للموضوع. سواء من باب انه يحافظ عليها اكتر من لو راجل غريب هو اللى بيسوق, او لانه هايكون توفير كبير اوى للعمالة الاجنبية, لان بند السواقين ده هناك جامد جدا

ثانيا لاننا فى كل العالم نقدر نساعدهم بنشر قضيتهم و نساندهم فى ان صوتهم يوصل و مطلبهم – الشرعى – يتحقق ان شاء الله




 كمان فى نية ان هيكون فى مبادرة (علمنى اسوق) لتعليم السيدات السواقة.

خليكم معاهم باللى تقدروا عليه لو سمحتوا.

الستات دى هاتخاطر بحياتها و حريتها و اشغالها. اقل حاجة ممكن نعملها هى اننا نساندهم بكل اللى نقدر عليه
و تحية خاصة من قلبى لكل ست شجاعة هاتكون هناك و تتحدى القوانين الظالمة الذكورية البعيدة كل البعد عن الاديان و حقوق الانسان.
و هنا فى حملة لمحاولة حماية الستات دى للى عنده افكار عايز يشارك بيها او يزود عليها

و على فكرة, الموضوع ده مهم جدا لانه ان شاء الله هايكون بداية تغيير النظرة الدونية للمرأة السعودية اللى بتحطها دايما فى خانة المفعول به. فهى بنى آدم كامل له حق اختيار حياته و اتجاهاته>

و الدليل على الكلام ده هو الحملة المتخلفة المضادة - الظاهر السعودية كمان عندهم فلول - اللى بتدعو لعدم اللى هاتسوق. ربنا ينتقم منكم يا رب و يريحنا منكم قادر يا كريم

انا مع ستات السعودية
و يا ريتنى اقدر اجى لكم و معايا رخصة سواقة دولية

يا ريت اى واحدة تقدر تكون هناك , و اى راجل مؤمن بالقضية يساند الستات دى يا جماعة



ربنا معاكم يا رب

Monday, May 2, 2011

قانون الاسرة مش قانون سوزان و مش مخالف للشريعة


قانون الأحوال الشخصية ليس من صنع الهانم‏!
 



والبداية مع الدكتورة فوزية عبدالستار الخبيرة القانونية و استاذ القانون بجامعة القاهرة التي قالت ان قوانين الاحوال الشخصية لابد ان تكون مستمدة ومستندة الي الشريعة الاسلامية لانها تتعلق بالحلال والحرام مشيرة الي ان القوانين الحالية كلها الصادرة قبل تولي مبارك الحكم بستين عاما ومنها القانون الصادر عام1920 و1929 وفي عهد مبارك صدر القانون100 لسنة85 وأيضا قانون رقم1 لسنة2000 الخاص بتنظيم بعض أوضاع وإجراءات التقاضي بالأحوال الشخصية كلها وبلا اي استثناء مستندة الي الفقه الاسلامي والشريعة, مشيرة الي ان القانون المصري يأخذ بالمذهب الحنفي!

ده اصل القوانين فى الاساس

وعندما تم تعديل هذه القوانين كانت تستند ايضا الي رأي فقهي وكانت التعديلات تستهدف دائما سد بعض الثغرات في هذه القوانين حيث كان المشرع يغفل بعض الاحكام الشرعية وكان لذلك انعكاسه علي وضع المرأة المصرية.

تعديلات زى ايه يعنى؟

علي سبيل المثال:

1- قانون عام85 قنن حق المرأة في نفقة المتعة:
*وهذا مقرر بالشريعة الاسلامية وبالآية الكريمة: (و للمطلقات متاع بالمعروف حقا على المتقيين) من سورة البقرة.
*فلم تكن المرأة تحصل علي هذه المتعة ونص عليها هذا القانون لانه لم يكن منصوصا عليها بالقانون.

2-قانون العام2000 قنن للمرأة حق الخلع:
*وهو مقرر في الشريعة وكانت محرومة منه, مما كان يشكل أمامها عقبة شديدة للتخلص من زواج لا تطيقه.

3-كذلك عدل القانون2005 ورفع سن الحضانة الي15 سنة لكل من الولد والبنت ثم يخير بعد ذلك الصغير بين الام والاب:
أما مسألة الرؤية فهي مقررة في هذه القوانين ومتروكة اتفاقا او قضاء والقانون. الاخير نص علي ان تتم الرؤية في مكان مناسب لا يؤثر علي نفسية الصغير (اللى هى الحاجة اللى كتير مش واخدين بالهم منها اصلا فى الموضوع ده كله)


------

وانا اري من خلال خبرتي بالقانون ان في هذه القوانين الكفاية بالنسبة للمرأة فالاسلام يدعو لصلة الرحم لا لقطعها وأثيرت فكرة الاستضافة في الفترة الاخيرة وهذه المسالة لا يحكمها الا معيار واحد فقط هو معيار مصلحة الصغير, فاذا كانت هناك مصلحة له في الاستضافة فنحن نرحب بها اما اذا وجدنا بها اضرارا له لاسيما الناحية النفسية فيجب الا تقرر فانه لايصح ولا يجوز اطلاقا ان يكون الصغير البريء هو ضحية الخلاف بين الوالدين ولذلك اري في حالة الطلاق او الخلع ان يظل الوالدان علي علاقات طيبة وودية طالما ان هناك اطفالا ومسألة الرؤية والاستضافة لن يكون لها اي مساوئ علي الصغار في هذه الحالة اما عندما يكون الخلاف محتدما بين الابوين وانتقل الصغير من حضانة الام مثلا ليقضي اجازة محددة عند الاب فإنه يخشي هنا علي الطفل من التأثير عليه فلا نضمن معاملة الاب أو زوجة الاب او أهل الزوج أو العكس فيتم تشويه صورة الطرف الآخر في نظر الصغير وهنا تهتز نفسية الطفل ويثور الصراع النفسي في اعماقه ليفقد الثقة في والديه وهنا مكمن الخطورة علي مستقبل هذا الطفل وفي مثل هذه الظروف لابد ان يكون الفيصل هو مصلحة الصغير ولابد ان يتحمل احد الابوين التضحية من اجل مصلحة هذا الطفل نحن لا نريد شبابا مشوها نفسيا, فالطفل ليس له ذنب في اختيار الاب والام لانه سوف يدفع ثمن الخلاف ( انا عايزة اسقف لك و ابوسك)


كما اكدت ان حق الرؤية هو حق الاب ولكنه اساسا حق للطفل فمن حقه ان يعرف والده ويتجاوب معه والقانون التزام عليه واذا لم يحضر اكثر من مرتين بغير عذر مقبول يمكن ان يحرمه من الرؤية لفترة معينة واذا تكرر عدم التزامه برؤية ابنه في موعده يتكرر الحرمان اذا لم يقدم قبلها او بعدها عذرا مقبولا او شهادة شهود. فهل من مصلحة الصغير ان نشتته ونعرضه الي صراع بين ثقافتين مختلفتين


...................................


"لالالالا دى ست و لازم حتنصر الستات, طبيعى يعنى!"


تنظيم الرؤية
 
ويوضح المستتشار حسن حسن منصور نائب رئيس محكمة النقض ان وزارة العدل قامت بتنظيم احوال الرؤية وكيفيتها واماكن التنفيذ. والقرار يحدد عدد مرات الرؤية في الاسبوع الواحد مرة بحد ادني ثلاث ساعات وفي الاماكن التي تتناسب مع نفسية الطفل وظروفه مثل النوادي العامة في حضور اخصائي اجتماعي مؤكدا وجود مشكلات بالجملة في تطبيق هذه الاحكام القانونية بسبب تعنت كل من الطرفين. واشار الي ان هناك آباء لايحضرون الي مواعيد الرؤية وقد لايهتمون و يعود ذلك لعدم وجود شرط جزائي او قانوني مثلما هو مطبق علي الحاضنة المتسببة في عدم تنفيذ احكام الرؤية لهذا يجب ايضا ان يكون هناك جزاء مساو للاب الذي لاينفذ او يتعنت او يعرقل تنفيذ الرؤية ليصبح من حق القاضي حرمان الاب من رؤية ابنه مده معينة (ايه ده؟ راجل بيقول كده؟). وقال ان القوانين المنظمة للاحوال الشخصية ليست قوانين اشخاص ولا يوجد بها مادة مخالفة وكلها شرعية وفقهية


برضه الراجل بيقول كده؟ يعنى هى بجد بقى مالهاش دعوة برجالة و ستات فعلا و القوانين مش مخالفة للشريعة!! يا سبحان الله


----------

مشروع قانون:

وتتساءل الدكتورة فرخندة حسن الامين العام السابق للمجلس القومي للمرأة: لا اعرف لماذا وما سبب هذه الضجة؟ وليس هناك مشروع قانون مطروح بصورة جدية ولماذا يجب ان نهدم كل شيء بنيناه في سنوات طويلة؟.. ونفت نهائيا ان يكون المجلس القومي للمرأة قد قدم أية مقترحات في الاحوال الشخصية (و ماتقدموش ليه اصلا؟ امال لازمتكوا ايه؟ هى تهمة؟؟!!) والمقترح الموجود في وزارة العدل هو ما اسماه وزير العدل السابق بمدونة الاحوال الشخصية اعدتها وزارة العدل ولم تقدم للبرلمان أو المناقشة في اي تجمع ايا كان ولا الرأي العام مشيرة الي ان المجلس قدم مشروع قانون مكافحة التحرش الذي خرج منذ شهر وكان المجلس القومي قدم اكثر من تعديل له بصورته الحالية وقد تم وضعه بالادراج الي ان جاء المستشار عبدالعزيز الجندي وزير العدل واخرجه للنور فلابد ان يكون هناك علاقات بين الطرفيين للصحة النفسية لاطفالهم, كما قالت انه علي مدي25 سنة هناك ما يقرب من24% من النساء المعيلات مطلقات ومنفصلات (آه يانا. و نقول كده يقولوا ازااااى؟!) وتمنت من وزارة العدل ان تخرج بتعديلات قانونية منصفه للاسرة ولا تضر بالاطفال لانهم الضحية في النهاية والشريعة اعطت للمرأة حقوقا تحفظ كرامتها لأعلي درجة لكن للاسف القانون متباطئ في تنفيذ الاحكام وتطبيقها واروقة المحاكم تشهد بذلك


 

.............


اظن مفيش كلام بعد الكلام ده. يا ريت بقى نبطل افترى و عك فاللى مالناش فيه و نسمع كلام اللى بتفهم المتخصصة اللى اتفقوا على ان قانون الاسرة من اسمه مهتم بحال الطفل فى الاساس. 

و اتمنى من قلبى ان الاخوان و الجماعات اللى معاهم فى الموضوع ده يعقلوا و يتراجعوا بسرعة لان الحكاية دى مش حتهدى بالوقت. الستات فى مصر اتبهدلوا سنين عشان القوانين دى. و لو تفتكروا قصة البنى آدمة الغلبانة اللى بعتت مرة لكاتبة فى جرنان, و كانت بداية لاشياء كتير اوى. الكاتبو كانت حسن شاه فى عامودها فى جريدة الاخبار كل سبت و القصة كانت قصة فيلم اريد حلا اللى – لو ماتعرفوش – عن احداث حقيقية. 

ايوة ... فى ستات شافوا و بيشوفوا الكلام ده بجد, و لكوا ان تتخيلوا هنا الاطفال بيبقوا عاملين ازاى


حبة رحمة!! ديننا قال كده