فيه حاجة اسمها عيب

اصل قلة الأدب مالهاش دوا ولا قانون.

اى بتاع مالوش لازمة بيفتكر انه خفيف الدم اما يقل ادبه على مخاليق ربنا.

بقالى فترة متابعة خفة دم وسماجة على الانترنت اللى بيعملوها – واللى بيروجوها – مش حاسين شكلهم باللى بيعملوه.

شكلنا نسينا ان الخوض فى الأعراض وخصوصيات الإنسان دى مش حاجة سهلة... لأ وتضحك.

بقى اننا ننكت على علاقات فى السر بين الشخصيات العامة حاجة لطيفة. ناسيين ان الناس دى بنى آدمين ولهم ناس فى حياتهم واحتمال يكون عندهم عيال ممكن يوصل لهم الكلام ده.

انا مش هحط اى صورة من الصور اللى هاتكلم عنها عشان مش عايزة اشارك فى نشرها واتمنى من كل اللى رافض الفكرة انه يعمل كده ومايساهمش فى ترويجها.

الأول تابعت مجموعة صور من البرلمان تريقة مرة على شعر واحد، ومرة التانى. والستات طبعا نصيبهم من التريقة كالعادة نصيب كبير.

بعدين النفسنة على عمرو حمزاوى طفحت اما بقيت حاسة ان اللى بيعملوا الصور عليه قربوا يولعوا وريحة الشياط تطلع من اكاونتاتهم.

وشوية و نلاقى صور فيها عضو وعضوة ويحطوا عليها كلام مفروض يضحك وهو كله ايحاءات مخلة وفيها اتهام للناس وتشكيك فى سلوكهم وخوض فى حياتهم بشكل مقزز.

ومش عارفة مين بيلف على مين، ومين غيرانة عشان مش عارف ايه.... قرف قرف

امبارح ماريان اتعمل لها كمية صور تريقة كلها فيها اهانة شديدة لها وتسفيه ليها. يا جماعة دى عضو برلمان... ولا هى عشان بتشتغل بجد و بتحاول وهى صغيرة فى السن تنفسنوا عليها وخلاص وانتوا فاضيين ولا لكم لازمة اصلا؟

انتوا عارفين ان ماريان دى هى اللى عملت طلب الإحاطة الخاص بحادثة تهجير الأقباط فى العامرية فى عز ما كل ما عامل نفسه نايم ومش واخد باله من الموضوع؟

انتوا عارفين ان العضوة سناء اللى ماسكينها تريقة "عشان ست" وخلاص هى اللى طلبت من رئيس الوزراء عمل تحقيق عن تمويل الإخوان ومحدش فيكم عارفين يعمل اى حاجة مفيدة اصلا؟

ولا هى نفسنة وكلام ع الفاضية والفاضية وخلاص؟

واخرتها النهاردة شفت صورة قمة السفالة والإنحطاط لعمرو وبسمة من فرحهم وتشبيه بناس تانية فى احاء فى قمة الوطو يعنى. ايه فى ايه؟

مش لازم تكون مقتنع ان الناس دى بتعمل صح.

ممكن – ومن حقك اصلا – تكون مش مقتنع بيهم فى مناصبهم.

بس مش من حقك تخوض فى اعراضهم، خصوصياتهم، حياتهم وحياة المقربين ليهم.

عيب

عيب

عيــــــــــــــب

عارفين الكلمة دى؟ محتاجين نفكر بعض اننا نتحمل المسئولية شوية يا جماعة، كويس يعنى اما اسمع ان عمر سليمان كان عنده حق اما قال اننا مش مؤهلين للديموقراطية؟

من حقك تقول فلان مش قوى كفاية كعضو برلمان، بس ماليكش دعوة بجوازه وطلاقه وعياله

اتكلم عن تصريحاته وناقشها، لكن مش حاجة اصلا تتاخد عليه ان شكله مش عاجب سعادتك

يا ريت نحترم نفسنا شوية يا جماعة. وبلاش ترويج لصفحات على الفيسبوك من العينة اللى بتروج لنوع من السماجة بيعتبر ضحك انه "يتريق" على مخاليق ربنا... مايصحش

انا شخصيا طلعت النهاردة من كل الصفحات اللى حطيت الصورة دى

بلاش قرف