من كل ناحية

اول يوم العيد فى لقاء عائلى قابلت ناس لهم معزة عندى، فيهم ست انا عارفة انها ست فى حالها وعمرها ما عملت مشكلة لحد وتفكر الف مرة قبل ما تأذى بنى آدم. الست دى كانت هتفتح سيرة السياسة والحمد لله الموضوع اتلم. ست كنبة رافضة للثورة من اول يوم فلول تحترم مصطفى بكرى وعكاشة وبتكره الاخوان وبتحب عمر سليمان والسيسى

الست دى لو انا سألتها نفسك مصر تبقى ازاى هتحكى عن مصر تخوفنى، مصر تقبض قلبى وتقلقنى على بنتى ، مصر مش ليا وماليش اى مكان فيها لا انا ولا بنتى

ولو انا حكيت لها عن مصر اللى نفسى فيها هى قلبها هينقبض وهتعيش خايفة وهتحس ان ايامها خلصت فى الدنيا وهتبقى قلقانة على نفسها

وده وضع مالوش حل

مصر دلوقتى بتغرق والمية فيها من كل ناحية

وده فى حد ذاته مش هو المشكلة

المشكلة ان الناس عايزة تموت، عمالة بتملى مية وتحطها فى السفينة ورافضين يتنقلوا من حتة لحتة عشان الوزن. وانا ماليش اقول لحد يعيش ازاى، انا ايش اكون؟ بس انا مش عايزة اموت وفسى بنتى تعيش

اعمل ايه؟

البلد دى بلوتها الكبرى انها مش بتحصل فيها كوارث، كوارث بجد اللى هى براكين وزلازل جامدة وقنابل نووية وكده، الناس اغلبها واخد الحياة for granted ومفيش حاجة عنده تستاهل انه يتعب لها

وانا طالبة فى طب، فى الأول، كنت فعلا بذاكر غط، وعشان كده كنت بسقط كتير. كان اه عندى مشاكل اسرية كتير مخلية المذاكرة مش موضوع سهل ومتوفر، بس الحقيقة انى لما كنت باقعد اذاكر كنت بذاكر غلط. وكل مرة كنت اسقط كنت اسمع الناس تتكلم عن الواسطة اللى موجودة فعلا والدكاترة المفتريين اللى موجودين وحاجات تانية كتير موجودة على انها سبب سقوط الطلبة. وهى اسباب حقيقية، بس كان فى سبب مهم جدا محدش بيتكلم فيه وهو انى بذاكر غلط

غلط اللى هو ماينفعش فى كلية طب عين شمس مش غلط غلط. يعنى ماكنتش مستوعبة ان المطلوب منى هو انى اقعد احفظ الكلام زى ما هو زى القرآن واسمعه كده زى ما هو فى التحريرى عشان يبقى كلام كتير مرصوص كده. مش مهم انى فاهمة ولا مش فاهمة

وبعيدا عن الفلسفة فى هل دى مذاكرة بنى آدمين ولا تدريب حمير فى سرك فاشل، انا كنت طالبة فى الكلية دى وماينفعش انى اقرر مع نفسى انى هذاكر بطريقة تانية وازعل واستغرب اما اسقط

فهمت الموضوع بعد كده، وبقيت شاطرة فيه فى الآخر، وبقيت حمارة جامدة فى الماجستير، لدرجة ان فى امحتان الجزء الأول وانا بذاكر الoptics حفظت حتة مكتوبة فى كتاب القسم مش موجودة فى اى مرجع عندى ولا على النت ولا فى اى داهية وضد العقل والمنطق وغلط اصلا، وسألت فيها كل اللى اعرفهم من اول زمايلى اللى داخلين معايا لحد اللى عرفت اوصل لهم من اللى اكبر منى... حفظتها زى ماهى

وطبعا نجحت

ومرت السنين وبطلت اشتغل دكتورة وماكملتش الماجستير لحد دلوقتى

لكن اتعلمت ماقولش انى ماتجحتش بسبب ان التحكيم ظلمنى ولا ان اللعيبة كانوا عاملين لى سحر، ولا اى حاجة تانية طالما انا عارفة انى مش مذاكرة المذاكرة المناسبة للمسابقة اللى داخلاها

مصر كلها ماعدا 15 بالعدد، بيقولوا ان خسارة غانا بسبب خمسميت حاجة من السحر للشعوذة للاخوان ومش بيتكلموا فى ان الفريق خسران من قبل مايلعب، واننا عيب علينا نقول غير كده

مواجهة النفس بأسباب الفشل مهمة عشان تخلى الواحد يتقدم فى عيشة اللى خلفوه بدل ما يفضل يعلق فشله على اى حاجة غير انه مش عارف ينجح

بشر كتير اوى فى حياتى شاغلين نفسهم بأنا عايشة ازاى وباربى بنتى ازاى وبعودها على ايه وهم مش عارفين انهم مش بيخطروا على بالى اصلا، نهائى، ماعرفش يومهم عدى ازاى وحقيقى لو زهقانة مبحلقة فى السقف مفيش حاجة اعملها مش هابقى عايزة اعرف هم عملوا ايه، واللى بحبهم فيهم بحبهم انى اشوفهم مبسوطين وبس

اما الناس دى بتتحشر بحس حد دابب ضوافر صباعه الطويلة فى جلدى بشكل مستمر مؤلم مستفز وبقاوم رغبات مميتة فى العنف المبرح والصريخ جوا بقهم لحد ما افجرهم ... غضب شديد

خصوصا انى لو فكرت ابص فى عيشتهم اغلب الوقت هبقى مش عايزة اعرفهم تانى لانى شايفة عيشتهم بالنسبة لى المعيز والبقى لهم فايدة عنهم، على الاقل دول بيدوا سماد للأرض ولحمة للبشر ياكلوها

لا لهم لازمة ولا فايدة ولا اى منطق فى وجودهم وكمان عايزين يكلمونى ويقولوا لى اعيش ازاى

من تلات سنين بس كانت طاقتى وقدراتى الجسدية خمس اضعاف دلوقتى على الاقل، كنت باقدر فى اليوم الواحد اروح الشغل واشتغل كويس وبنفس وحركة وارجع واقرا واسمع مزيكا واشوف FRIENDS و ER واتكلم فى التليفون واحب وآكل واستحمى واغسل هدومى وارقص وانام ... دلوقتى انا باعمل اللى لازم اعمله وماينفعش ماعملوش وكمان باعمله وانا تعبانة.

بحاول افتكر آخر مرة مكانش فى حاجة فى جسمى وجعانى مش فاكرة

دلوقتى مثلا بكتب بايدى اللى فيها مشكلة ومش مفروض اكتب بيها كتير

اللى باقوله هو نص اللى حاسة بيه وزهقت من الألم وشكوته واحساس الوجع والتعب والنفس المقطوع

دلوقتى قاعدة فى الreception فى فيلم على MBC2 عاملة له ميوت مش عاجبنى، واصوات رجالة بتجعر فى الشارع عشان متخيلين ان دى رجولة وحرية وكول وكده، وريحة لحمة ضانى مقرفة، وشايفة الساعة عديت حداشر ولازم اقوم انام فرصة قبل ما لمى تصحى جعانة حتى رغم انى مش نعسانة اوى

انا تعبانة اوى