Friday, March 11, 2011

الله يرحمك يا زياد


اخيرا بعد اكتر من شهر لقينا زياد بكير ... جثة ... برصاصة فى الرقبة حسب مصدر من عائلته

الله يرحمه و يصبر والدته, و والده, و اخته, و زوجته. و الله يهدى اطفاله يفهموا يعنى ايه ابوهم مات برصاصة فى الرقبة عشان الشرطة المصرية شافت ده من حقها لان زياد كان عايز يسقط نظام الفساد و الفجر و الافترى. 

ماعرفش اذا كان ليا عمر اشوف ولاده كبار ولا لأ, بس اتمنى انهم على ما يكبروا, يكون صوت "كفاية بقى" و البلطجية كتروا و ارحمونا بقى, يكون صوت خفى, عشان مش عارفة ممكن يسمعوه ازاى.


انا حاسة ان كلامى ملخبط. و متنحة مش عارفة افكر من ساعة ما عرفت الخبر

مع شهادة الشباب اللى الجيش عذبهم, غير اللى سجنهم

مع الكلام مع الاقباط المعتصمين امام ماسبيرو




مش عارفة ... مش عارفة اى حاجة, ما عدا حاجة وحيدة, ان زياد باذنك يا رب مش هاتموت هدر. زياد شهيد عشان البلد توصل للى طول ماحنا عايشين هنحاول انها توصل له.



يا رب



Thursday, March 10, 2011

كن مع الثورة ... لا للطائفية, نعم للوحدة الوطنية, و كلام عن الدستور



بكرة ان شاء الله اعتصام – بدون بيات – فى التحرير عشان نقول لا للطائفية و نعم للوحدة الوطنبية, غير مطلب اسقاط امن الدولة و ما يتعلق بالدستور. اللى هو ليسة مش واضح اوى على قد علامى و مخى يعنى. اول ما اعرف هاقول على طول.

بصوا, هحاول اما بليل اهدى كده افكر بصوت عالى فى حوار الدستور ده مهم ان شاء الله

اشوفكم بكرة فى التحرير ان شاء الله

و اما نشوف اخرتها معاكى يا بلد ... طيب يا بلد


Wednesday, March 9, 2011

عن جهاز امن الدولة - الحل هو الحل


دلوقتى عايزة اسأل سؤال.

هافترض جدلا – مجرد افتراض – ان فى ناس كويسة و فى ناس وحشة فى امن الدولة. الناس الوحشة دى احنا عارفين و متفقين انها ضد المجتمع و سلامه. اللى ممكن يكون فيه خلاف عليه هو ان فى ناس فاهمة ان حل امن الدولة معناه تسريح الناس دى من العمل و ده مضر لانهم هايكونوا فى الشارع.

يعنى انتوا بتقولوا بدل ما يبقوا خطر ع المجتمع ضد القانون يبقوا خطر ع المجتمع بالقانون و الطبنجة الميرى و الكادر الوظيفى جوا وزارة بحساسية وزارة الداخلية؟ انا كده فاهمة صح؟

و بعد كده راجعين تزعلوا ان الشرطة فاقدة المصداقية فى وسط الناس؟

هو الكلام لانه هياخد وقت مع الداخلية انها تعترف بيه و تنفذه, انتوا خايفين تعترفوا بيه. لكن الحل الوحيد لرجوع الامان للشارع هو ان قتالين القتلة اللى فى اى جهاز فى الداخلية يتحطوا فى السجون و يتحرموا تماما من اى اعتراف رسمى بيهم فى الحكومة. بدل ما نطالب بمحاسبتهم, نقول حرام نشغلهم فى الشرطة و اهه اجرام جوا الشرطة ارحم من اجرام فى الشارع؟؟

ازاى فى ناس ضد حل جهاز امن الدولة بس عشان خايفين من الجبابرة اللى كانوا فيه لا يسرحوا فى الشوارع؟ و هم و هم جوا الداخلية سارحين فين؟ فى تنزانيا؟ ماهم طالقين علينا سمومهم برضه, احنا هنضحك على بعض؟؟
اما لو فعلا المعجزة بتاعت ان حد فيهم كويس, الشرطة محتاجة كوادر زيهم دلوقتى فى الوقف الحرج اللى احنا فيه ده امنيا. يقفوا للبلطجية اللى راعبين الناس فى مناطق كتير ... سهلة اهى

النقطة التانية بقى. هى اختصاصات امن الدولة. من الاول كده, احب افكر الجميع ان الجهاز ده اصلا اسمه البوليس السياسى لكن سوء سمعته و ارتباط اسمه بفضايح صلاح نصر الجنسية فى المقام الاول, مع اسباب تانية كان ورا تغيير اسمه لامن الدولة, عشان من الآخر يضحك على الناس و يفهمهم ان الجهاز ده له علاقة بيهم و بامانهم, فيرتبط عند الناس بالامان اللى هو حاجة مهمة و ضرورية للحياة.

لو جيت سألت اى حد من اللى ضد حل الجهاز, هاتلاقيه بيقول "اعادة الهيكلة" تسأل يعنى ايه يقول يعنى يرجع تانى لاختصاصاته الاصلية, تسأل بقى اللى هى ايه ماتلاقيش اجابة. بدليل ان ريم ماجد فى برنامج بلدنا بالمصرى سألت احمد شفيق السؤال ده بشكل مباشر بتاع تلات مرات – و الحلقات موجودة ع النت – و هو ماجاوبهاش. لانه و ببساطة مالوش اى لازمة غير التجسس و التنصت و خطف الناس. ده جهاز متربى و راضع و كبران على تبعات قانون الطوارىء, المنطقى تماما انه يختفى باختفاء قانون الطوارىء و نظام قانون الطوارىء.

احنا عندنا وحدة مكافحة الارهاب. و عندنا وحدة مكافحة المخدرات, و عندنا جنايات و تحقيقات و كمية اقسام جوا الشرطة تغطى كل حاجة. البوليس السياسى لازمته هاتبقى ايه؟؟ و لو فرضا فى ناس شايفة ان الاجدى اننا نألف له لازمة مفيدة يعنى, ما نعمل جهاز جديد باسم جديد و كوادر جديدة مناسبة من داخل الشرطة و نوظف الكويسين اللى كانوا فى امن الدولة فيه. ايه المشكلة بقى؟؟


يا ريت بجد تجاوبونى ع الاسئلة دى و تفهمونى اللى انا مش فاهماه


شكرا

Tuesday, March 8, 2011

اليوم العالمى للمصريين


سلامات يا مصريين

من امبارح و انا عمالة افكر فى موضوع اليوم العالمى للمرأة ده

اليوم العالمى للمرأة فى العالم عبارة عن اليوم اللى الستات فيه بيفكروا الدنيا بمكشاكلهم العامة, و فى كل مجتمع بتتم الاشارة للمشاكل اللى ستات هذا المجتمع تعانى منه.

انا مثلا, كلامى و كل مجهودى مركزاه على قضية العنف – تحديدا الاسرى – ضد المرأة. بس مش عارفة اعمل كده النهاردة

يعنى الشعب المصرى كله انضرب و انداس و اتقتل من الداخلية, و بيتضرب دلوقتى من البلطجية, و الجيش كل حبة كده يكهربنا ... و انا اتكلم فى العنف ضد المرأة؟ مش شايفاها تركب خالص بصراحة!!
فى الوقت اللى اى مصرية بتطالب فيه بالمساواة و المواطنة, ينفع نفس المصرية تفصل نفسها عن المجتمع كله فى فترة الشعب فيها فى ثورة و ما يشبه الحرب؟
رغم الاقتراب من الموت, و المشى ع الدم, و مشاهدة اقسى درجات العنف, لكن يوم 28 يناير شهد حدوث اكبر امنية من امنيات حياتى ... فى اليوم ده انا ماكنتش ست, فى اليوم ده انا كنت بنى آدم. ماكنش فى اى فروق بيننا. لا جنس ولا دين ولا سن ولا مستوى اجتماعى. كانوا الناس بيرموا لنا المية و البصل و نشرب سوا و نقطعها سوا. كان الواحد بيقع الكل يلحقه من غير ما يبص هو ايه.
الحالة دى عشان تستثمر لازم احنا نحافظ عليها و نتعامل بيها. و اول خطوة لموتها هى انى النهاردة افلتنى لوحدى عن كل راجل بيتأذى فى البلد من عنف السلطة و اتكلم عن العنف اللى ضدى. انا عارفة انه هو اللى كان عنيف. بس عارفة برضه ان احنا الاتنين دلوقتى واقفين جنب بعض, مش انا اللى هابدأ بالفرقة.
بعيد عن كل ده بقى. البلد هتولع فى وقت حرج بين الاقباط و المسلمين. امن الدولة شغال حلاوة و مقوم السلفيين و عاكين عكهم اياه.
وللعلم بس عشان تبقوا فاهمين. انا من ضمن الناس اللى شافوا ظلم بين فى تجاهل الستات و المسيحيين فى لجنة تعديل الدستور, و رغم انى اتدايقت لكن كنت حاسة انه مش وقت الكلام ده خالص عشان فى هدف اكبر. بس احنا مفروض حفظنا الدرس... الاحتفان يؤدى للانفجار. النهاردة الاقباط ثايرين عشان كنيستهم اللى اتهدت. عايزين تعملوا ايه فى الستات تانى عشان تشوفوهم ثايرين؟
اللى مطمننى ان نفس الناس اللى كانت معايا و جنبى هم نفس الناس اللى رافضين دلوقتى الطائفية و هد الكنايس و هم برضه اللى هايكونوا ضد اى ظلم ممكن تتعرض له المرأة لو حصل اصلا لا قدر الله.
بس وحياة ابوكوا يا ستات ... والله ما وقته خالص يوم المرأة و الكلام ده و الناس ليسة مسجونة تحت الارض و اهاليها مش عارفين هم احياء ولا اموات ... حبة وعى بقى!!

امن الدولة بيولعها و كل دى محاولات ضد الثورة اللى ان شاء الله هتحمى كل البنى آدمين, ستات و رجالة, اقباط و مسلمين.
انا لو هنزل اى مظاهرة النهاردة, هاتكون مع الاقباط و ضد الطائفية و الفرقة بكل اشكالها. 

لا للطائفية ... لا للانقسام

Monday, March 7, 2011

التطور الطبيعى


عايزين تعرفوا ليه فى مصريين ضد الثورة؟ اقول لكم


1
طالب طب اللى بعد كده بيبقى دكتور:
بنى آدم من اول يوم فى الجامعة بيسلم لفكرة انه يحفظ زى الحمار من ملزمة الدكتور و مش مهم يعرف كلمة واحد زيادة عن الملزمة عشان يفهم, لانه مش مهم يفهم.
هو نفس البنى آدم اللى حتى مش بيحس بالاهانة اما يتهان فى امتحان الشفوى لانه شايف انه ده عادى, كرامته مش موضوع يعنى
و هو اللى بيتذلل هو و اهله للوسايط عشان يروح امتحان الشفوى ياخد الدرجات يمكن ينجح, او يجيب تقدير, كل واحد حسب طموحه
و هو نفسه اللى و هو امتياز بيقضيها كافيهات و مصاحبة و مش عايز يتعلم لانه تقريبا عارف و متأكد انه مش هايتعلم
فلما يتخرج بيرضى باللى الحكومة يتديه بقى و اهه وظيفة و السلام, لا هايتعلم طب ولا ياخد خبرة ولا فلوس. و اهو عمر و صحة و طاقة عالفاضى
و هو اللى بيبقى قرب التلاتين و ليسة عايش باعتماد مادى كامل على اهله عشان راضى يبقى مرمطون للدكاترة الكبار يكتب لهم تقارير مطبوعة اصلا و يشرف على ان العيانين لبسوا لبس العمليات و علموا الفحوصات هو الاستاذ ييجى يعمل العملية و هو عايش بيضحك على نفسه بحلم انه احتمال بعد عشرين سنة يبقى زيه و هو عارف ان ده مش هيحصل, و انه عمره ما حيفهم فى شغتله بالقدر اللى زى الدكتور اللى بيودى مامته ليه.
و هو اللى عايش حياته اسير "لقب دكتور" و "منظر البالطو" و اهه "بريستيج المهنة " مهم. بيعمل ايه بجد مش اشكال خالص


2
الستات ضحايا مختلف انواع الايذاء و الاهانة و التحرش و العنف
هى الست اللى بتعيش عمرها منهارة لو مفيش راجل فى حياتها. و عايشة منكوشة و مهبوشة و فيها حاجة غلط و مش مضبوطة كده
و اول ما يبقى فى راجل فى حياتها, حالها بينصلح و تبقى زى الكوكب اللى اخيرا لقى شمسه عشان يلف حواليها, و رجليها اخيرا لمست الارض.
و اللى تبقى عايشة بتربى العيال و تصرف عالبيت و جوزها بيهينها و يهملها و ممكن كمان بيضربها و يخونها
و هى بتقول اهو "اسمى مدام" و "داخلة الراجل و خرجته بالدنيا" و ماعندهاش اى استعداد انها تطالب باى حاجة لو التمن حتى احتمال انها تقضى يوم واحد من غير راجل


3
صاحب اى عربية راكنة صف تانى و تالت عشان يجيب حاجة من محل و فى داهية طابور البشر اللى واقفين متعطلين وراه و ولا همه اصلا ولا شايفهم ولا دريان بيهم. و بالتالى مشكلة بيته بس هى المشكلة اللى هو شايفها.  

------

على فكرة كلنا ممكن نكون فى وقت اضطرينا نكون جزء من حاجة مش مرتاحين لها, و انا مش من حقى اصلا احط حد فى كرسى المتهم. انا اللى باستنكره ان فى فرصة كبيرة دلوقتى لان الواحد يكون جنب الحق و العدل, و ممكن اوى تكون جزء من حاجة رائعة بتحصل. مالكوا بقى؟ ماسكين فى الظلم و متبتين فيه ليه؟ ده انتوا حتى مش مستفدين منه!
ارحموا نفسكوا و ارحموا عيالكم من الوساخة. فى فرصة تعيشوا فى نضافة, ما تبقوش زى اللى مشى بعكاز سنين و دلوقتى فى عملية لرجله يرفض يعمل العملية عشان مش عايز يمشى من غير عكاز.
شموا ريحة الحرية, و الله طعمها حلو اوى


فكروا و ماتخافوش و انتوا بتفكروا