الجيش مش بيحمى ... الجيش بيختار

بصوا بقى ... كلنا جايبين آخرنا

و انا عارفة ان محدش طايق نفسه فى الايام السودة اللى احنا فيها دى

بس برضه هاقول الكلمتين عشان يمكن يبقى اعمى ليسة مش شايف فعلا, مش مش عايز يشوف

انا واحدة من الناس اللى لما مالك مصطفى قال لهم الشرطة العسكرية بتتهجم و من غير تهم ولا قانون ماصدقتش, و اللى لما اميرة الطحاوى اتكلمت عن تجاوزات الجيش مع الناس برضه ماصدقتش.

حتى يوم 26 فبراير اما كنا قدام مجلس الوزراء و روحت عشان كنت لابسة خفيف و الليلة كانت برد, و اول ما ركبت المترو العيال اتكردنوا و انضربوا, و امينة حكيت لى ... برضه قلت فى حاجة اكيد.

و فضل يوم 2 فبراير زى البلوة على صدرى

لحد ما من كم يوم شفت فيديو فض اعتصام ماسبيرو بالقوة, و شفت اللى بيضربوا اعزل و يتكاتروا عليه بمنتهى الندالة و الخسة و هو اعزل زاقع ع الارض, و شفت كبيرهم و هو مش عارف يسيطر و بيحاول يلم ايد واحد يقوم التانى ضارب

http://www.youtube.com/watch?v=3OAYMw25Q2U&feature=share

 

ساعتها بقى كنت عايزة افهم المنظر ... هو مش الجيش ده برضه بتاع طاعة الاوامر اللى زى السيف و الضبط و الربط؟؟ ولا ده كلام بطيخ؟؟

انا مش هحاول امنطق اى حاجة عن امبارح, عشان اى طفل ساذج اعمى ممكن يفهمها لوحده ... رد فعل الجيش كان بنتجان رسمى

فرضا جدلا جدلا يعنى واحد من المسيرة فتح نار على الجيش, فرضا يعنى, يكون رد فعلا الجيش هستيريا رصاص غير الدبابات اللى بتجرى فى كل حتة؟؟

و بعدين يرجعوا يقولوا لأ الناس كانت بتحدف طوب على المدرعات, و طبعا المدرعة برقتها المعهودة كانت فى خطر, رد الفعل يكون ان المدرعة تمشى تهرس الناس؟؟

و اللى مش عايز يصدق الهرس و بيقول عليه فوتوشوب, ياخد بعضه و يتفرج على الجثث, انا على قد اللى شوفته ماعرفتش انام امبارح. جماجم متكسرة, و امخاخ مفرقعة, و اطراف مبتورة... ايــــــــــــــــــه

فى ايـــــــــــــه

الجيش اتعته؟؟

خلاص النداهة ندهته؟ خبر اسود. اللافت للنظر بقى ان الكبار اللى قعدوا يتفرجوا على كل ده بيحصل و سكتوا.

ده مصر كلها عرفت, اكيد الجنرالات عرفوا يعنى:

-يا اما عرفوا و قرروا مالهمش دعوة و يسيبوا اللى موجودين يتصرفوا

-يا اما عرفوا و امروا باستمرار العنف

-يا اما عرفوا و امروا بوقف العنف و الامر ماتنفذش

و فى كل الحالات الجيش مسئول

من الآخر الضبط و الربط فى الجيش بقى طبيخ ... و العك اشتغل رسمى نظمى فهمى

ولا حد فاهم مين بيفكر فى الجيش, و لا حد فاهم الجيش بيفكر اصلا ولا لأ

الجيش "اختار" يضرب الناس

الجيش "اختار" يدهس الناس

الجيش "اختار" يتفرج على الناس و هي بتموت في موقعة الجمل. ببساطة لإنهم ما شاء الله اللي عايز فيهم يعمل حاجة بيعملها اهه و محدش بيكلمه. و أدينا شوفنا الفيديو بنفسنا.

يعنى كل شملول وقف يعيط و هو بيتفرج على الحصان بيفرم بنى آدم اعزل غلط و افتكر إن العسكري اللي من بلده بيحميه, هو في الحقيقة "اختار" يتفرج عليه بيموت

و عشان يبقى مفهوم يعنى الحكاية دى مش حيتسكت عليها. اهالى العيال اللي جثثهم متقطعة دى مش حيسكتوا, و أنا أولهم

و اهه تحريض اهه:

ماسبيرو ده يتقفل و يتحول مول خضار و فاكهة

و الجيش يسيبها بقى و كفاية عليه كده. مننا لعم عصام شرف و نشوف

مالكوش فيها ... قبل كده قالوا فراغ دستوري و أتصرفنا. صرفة هباب أه بس نفعت في وقتها

مالكوش فيه متشكرين على كده

و دم العرسان اللي راح ده غالى. و غالى عند كل مصر

و مصر النهاردة حزينة... على مايكل و مينا. و على غيرهم من المصريين اللى بجد "شرفاء"

يا ميت ندامة على جيش بلدنا

و إلى كل شخص في القوات المسلحة المصرية: عيشوا بشرف ... جاتكوا القرف