خلاص ... اكتئبنا و زعلنا و خلصنا
نقفل بقى الصفحة و نموف اون. عشان مفيش وقت. نتعلم من اخطاءنا و مانضيعش الوقت. و مطلوب دلوقتى خطوات واضحة.
الناس فى جزء مش هين منها خصوصا فى المناطق البسيطة اتلعب معاها على وتر ان الاقباط عايزين رئيس جمهورية قبطى. و امبارح شايفاهم فاتحين بقهم و حاسين انهم اخدوا مقلب. طبعا فى اللى اتساقوا بالاخوان و عارفين. و ماننساش الحزب الوطنى خاااااااالص. صراعنا مع الاخوان مهم, لكن صراعنا الاهم مع حرامية الوطنى.
1 مطلوب من شباب كل دايرة انهم يبقوا على اتصال دائم مع بعض.
2 بسرعة يتم التعليم على كل من له صلة و لو بعيدة بالحزب الوطنى, و دى مش صعبة.
3 برضه بسرعة تتفقوا على مرشح من بينكم و تتوافر فيه الشروط التالية: يكون حد مش معروف سياسيا بشكل فيه اى لغط, و يكون مقامه عالى فى وسط الناس زى مثلا استاذ جامعة معروف او دكتور او محامى او تاجر, حد اسمه يكون معروف فى وسط الناس بانه انسان كويس. لانه اللعب دلوقتى على انه واحد احنا عارفينه و مننا و عارفين انه نضيف مش هايسرقنا. واحد يكون ساكن وسطهم و شايفينه داخل خارج قدامهم. و كلامه يبقى عن اللى هو عارف انها مشاكلهم. طبعا كمان يكون حد له رؤية سياسية مش خدمية بس. لانه هايكون المرة دى عضو فى البرلمان اللى هيعمل الدستور.
4 يتم التوعية بسرعة بالوطنى و الاخوان. الناس معبية من الارقام المليارية اللى بتسمع عنها كل يوم من بهوات الحزب. و بعيدا عن بتنجان الفتنة, الناس فعلا فى الغالب مش عايزين الاخوان المسلمين, الناس عايزة تعيش و تسهر و تبيع و تشترى و تروح و تيجى. يعنى فى استعداد حقيقى اننا ممكن نديهم صابونة بس اهم حاجة التحرك بسرعة.
5 عشان خاطر ربنا, مش وقت خناق و تقسيم. بلاش بقى نظام ينزل 5 من الاحزاب و عشرة مستقلين فى كل دايرة, الاصوات هاتتبعتر و اللى هيكسبها كده الوطنى و الاخوان.
عايز تنضم لحزب حقك. عايز تشتغل مع حزب برضه حقك. لكن الاحزاب بتزيد و هم اصلا كتير. لو نص الاحزاب بس نزلت مرشح غير كم مستقل فى دايرة هاتلاقى فى الميت عشر مرشحين قدام مرشح واحد وطنى و مرشح اخوان. و كده هنشيل شيلة هنا.
6 الكلام مع الناس يكون بحقايق مش انطباعات و مشاعر. يعنى ماتقولش "احنا مش بنحبهم عشان اندال" .. لأ .. كلمة هتجيب عليك اللوم. الصح تقول "دول ماجوش معانا الا يوم 28 يناير" و يكون معاك نسخة متصورة من الخبر من كذا جرنان. و لو مش معاك توعده بشكل شخصى انك هتجيبها له و تانى يوم فعلا توديها.
المصداقية دلوقتى مهمة اوى ... اى خبر او معلومة خصوصا عن شخص غير مؤكدة و معاك دليل عليها بلاش منها خااااااااااالص.
7 فى دواير الحزب الوطنى مسيطر عليها بالفلوس اللى بيديها للناس و الناس محتاجاها. الدواير دى لازم ينزل فيها واحد من الناس دى. مالهاش حل تانى.
الوقت ده حيوى و ماينفعش خالص بقى انهزامية و اكتئاب. و ربنا بقى يحاسب كل واحد على نيته و اللى بيعمله. عشان ربنا اللى عارف كل واحد عمل ايه ليه
2 comments:
Allah ynwar 3leeky, dy el5olasa, we lazem yt3amal legan 3amal men kol elmo7afzat, ykoono 3la 2tsal beb3d, el25wan we el7ezb elwatny elba2ed 5atato lelmgales elnyabya bdoon el2ntzar lilnateega 3shan homa kano waskeen feeha. bas it's the time to learn the lesson and start the real work, we yareet nensa el23lam shwaya
feeh no2ta tanya mohema, yes el27zab btzeed gedan, we kol wa7ed ylem shela men so7aba we y3melo 7eza.
leeh kol elmagmoo3at we el27zab elly 2t3amlet delw2ty tetgama3 m3a b3d fy 7ezb wa7ed, el2t7ad kwa.
elshbab kolhom mrakzeen 3la elkahra we Alex bas, tarkeez el25wan tamaly bykoon fy elmo7afzat we el2kaleem.
i hope if we can organize. ourselves we will not reach to our aim with talking only
Post a Comment